‘ಸೇವಾ ತತ್ಪರ’ ಬಿ. ಭುಜಬಲಿ – ಧರ್ಮಸ್ಥಳ

ಬಿ. ಭುಜಬಲಿ ಅವರು ಶ್ರೀ ಕ್ಷೇತ್ರ ಧರ್ಮಸ್ಥಳದ ಜಮಾ ಉಗ್ರಾಣದ ಮುತ್ಸದ್ದಿ ಹಾಗೂ ದೇವಳದ ಉಪ-ಪಾರುಪತ್ಯಗಾರರಾಗಿ ಕಾರ್ಯನಿರ್ವಹಿಸಿ ನಿವೃತ್ತರಾದವರು. ಸುಮಾರು 48 ವರ್ಷಗಳ ಕಾಲ ಧರ್ಮಸ್ಥಳದಲ್ಲಿ ನಿಷ್ಠೆಯಿಂದ ಸೇವೆ ಸಲ್ಲಿಸಿರುವ ಅವರು ಅನುಭವಸಂಪನ್ನರಾದ ಸೇವಾವ್ರತರು.

ಇತಿಹಾಸ ಪ್ರಸಿದ್ಧ ಬಂಗಾಡಿ ಅರಸು ಮನೆತನದ ಬಿ. ಪದ್ಮನಾಭ ಶೆಟ್ಟಿ ಹಾಗೂ ಅನಂತಮತಿ ಅಮ್ಮನವರ ಪುತ್ರನಾಗಿ 1956ರ ನವೆಂಬರ್ 7ರಂದು ಜನಿಸಿದ ಭುಜಬಲಿ, ಬಾಲ್ಯದಲ್ಲಿಯೇ ಚುರುಕುಮತಿ ಎನಿಸಿಕೊಂಡವರು. ಪ್ರಾಥಮಿಕ ವಿದ್ಯಾಭ್ಯಾಸವನ್ನು  ಬಂಗಾಡಿಯಲ್ಲಿ  ಮುಗಿಸಿ, ಪ್ರೌಢಶಾಲಾ ವ್ಯಾಸಂಗಕ್ಕಾಗಿ ಧರ್ಮಸ್ಥಳಕ್ಕೆ ಬಂದು, ಮಾತೃಶ್ರೀ ರತ್ನಮ್ಮ ಹೆಗ್ಗಡೆ, ಡಾ. ವೀರೇಂದ್ರ ಹೆಗ್ಗಡೆ, ಹೇಮಾವತಿ ಹೆಗ್ಗಡೆ ಅವರ ಪ್ರೋತ್ಸಾಹದಿಂದ ವಿದ್ಯಾಭ್ಯಾಸದ ಜೊತೆಗೆ ವೃತ್ತಿಜೀವನವನ್ನೂ ಆರಂಭಿಸಿದರು.

ಧರ್ಮಸ್ಥಳವು ಸಾಂಸ್ಕೃತಿಕ ಕಲೆಗಳಿಗೆ ಆಶ್ರಯ ನೀಡಿದ ಕಾರಣ, ಯಕ್ಷಗಾನ, ಹರಿಕಥೆ, ಜಿನತತ್ವ ಪ್ರವಚನ ಮೊದಲಾದ ಕಲೆಗಳತ್ತ ಭುಜಬಲಿಯವರ ಒಲವು ಹೆಚ್ಚಿತು. ಮಂಗಳೂರು ಆಕಾಶವಾಣಿಯ ಮೂಲಕ ತಮ್ಮದೇ ತಂಡವನ್ನು ರಚಿಸಿ ಯಕ್ಷಗಾನ ಕಾರ್ಯಕ್ರಮಗಳನ್ನು ನೀಡಿದ ಅವರು, ಬಿ-ಹೈ ಗ್ರೇಡ್ ಮಾನ್ಯತೆ ಪಡೆದು, 2019ರಲ್ಲಿ ಎ-ಗ್ರೇಡ್ ಮಾನ್ಯತೆಯೂ ಗಳಿಸಿದರು. ಕಲಾಪೋಷಕರಾಗಿ, ಅವರು 100ಕ್ಕೂ ಹೆಚ್ಚು ಧ್ವನಿಸುರುಳಿಗಳನ್ನು ಬಿಡುಗಡೆ ಮಾಡಿ ಸಾರಸ್ವತ ಲೋಕಕ್ಕೆ ನೀಡಿದ ಕೊಡುಗೆ ಅಪ್ರತಿಮ. “ಗಾನಸುಧಾ” ಮೂಲಕ ಬಿಡುಗಡೆಯಾದ ಗೀತೋಪದೇಶ ಕ್ಯಾಸೆಟ್ ಆ ಕಾಲದಲ್ಲೇ 10,000ಕ್ಕೂ ಹೆಚ್ಚು ಮಾರಾಟವಾಗಿ ದಾಖಲೆಯಾದದ್ದು ಉಲ್ಲೇಖನೀಯ. ವಿದ್ಯಾಭೂಷಣ, ಪುತ್ತೂರು ನರಸಿಂಹ ನಾಯಕ್, ಶಶಿಧರ ಕೋಟೆ ಮೊದಲಾದ ಕಲಾವಿದರ ಧ್ವನಿಸುರುಳಿಗಳನ್ನು ಅವರು ಬಿಡುಗಡೆ ಮಾಡಿದ್ದರು.

ಭುಜಬಲಿಯವರು ಕೇವಲ ಕಲಾಪೋಷಕರಲ್ಲ, ಸಾಮಾಜಿಕ ಸೇವೆಗಳಲ್ಲೂ ಸಕ್ರಿಯರಾಗಿದ್ದರು. ಮಂಜುಶ್ರೀ ಯುವಕ ಮಂಡಲದ ಅಧ್ಯಕ್ಷರಾಗಿ ಯುವಕರಿಗೆ ಸಾಂಸ್ಕೃತಿಕ-ಸಾಮಾಜಿಕ ಚಟುವಟಿಕೆಗಳಲ್ಲಿ ದಿಕ್ಕುನೀಡಿದರು. ಅವರ ಕಾಲದಲ್ಲೇ ಯುವಕ ಮಂಡಲಕ್ಕೆ ಸ್ವಂತ ಕಟ್ಟಡ ನಿರ್ಮಾಣವಾಯಿತು. 2009ರ ಉಜಿರೆಯ ವಿಶ್ವ ತುಳು ಸಮ್ಮೇಳನದ “ತುಳುಗ್ರಾಮ” ಕಲ್ಪನೆಯ ಯಶಸ್ಸಿಗೆ ಅವರು ಶ್ರಮಿಸಿದರು. ಅನೇಕ ನಾಟಕ, ನೃತ್ಯ, ಪಂಚಕಲ್ಯಾಣ, ದೃಶ್ಯವೈಭವದಂತಹ ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಂಘಟನೆಯಲ್ಲಿ ಪ್ರಮುಖ ಪಾತ್ರವಹಿಸಿದರು.

ಸಾಹಿತ್ಯಾಭಿರುಚಿ ಹೊಂದಿದ ಭುಜಬಲಿ, “ಬಂಗ್ಲಾಡಿ ಇತಿಹಾಸ”, “ಅತಿಶಯಕ್ಷೇತ್ರ ಶ್ರವಣಗುಂಡ ಬಂಗಾಡಿ”, “ಪರಮೇಷ್ಠಿ” ಮೊದಲಾದ ಪುಸ್ತಕಗಳನ್ನು ಪ್ರಕಟಿಸಿದರು. ಜೊತೆಗೆ ಜೈನ ಜಾಪ್ಯ ಮಂತ್ರಗಳ ಕಿರು ಪುಸ್ತಕಗಳನ್ನು ಶಾಸ್ತ್ರದಾನವಾಗಿ ವಿತರಿಸಿದರು.

ಸಹಕಾರ ಚಟುವಟಿಕೆಗಳಲ್ಲಿ ಸಹ ಅವರು ಮುಂಚೂಣಿಯಲ್ಲಿದ್ದರು. 1986ರಲ್ಲಿ ಧರ್ಮಸ್ಥಳ ಸೇವಾ ಸಹಕಾರಿ ಸಂಘಕ್ಕೆ ಸದಸ್ಯರಾಗಿ ಸೇರಿ, 1994ರಲ್ಲಿ ಅಧ್ಯಕ್ಷರಾದರು. ಅವರ ಕಾರ್ಯದಕ್ಷತೆಯಿಂದ ಸಂಘವು ಲಾಭದಾಯಕ ಸಂಸ್ಥೆಯಾಗಿ ಬೆಳೆದಿತು. “ಸಾಧನಾ” ಕಟ್ಟಡ ನಿರ್ಮಾಣವು ಅವರ ಅವಧಿಯಲ್ಲಿ ನಡೆದ ಪ್ರಮುಖ ಸಾಧನೆ. ಇದಕ್ಕಾಗಿ ಅವರಿಗೆ “ರಾಜ್ಯದ ಶ್ರೇಷ್ಠ ಸಹಕಾರಿ” ಪ್ರಶಸ್ತಿ ದೊರಕಿತು. ಜೊತೆಗೆ 2001–02ರ ರಾಷ್ಟ್ರೀಯ ಸುಭಾಷ್ ಯಾದವ್ ಪ್ರಶಸ್ತಿಗೂ ಭಾಜನರಾದರು.

ಅವರು ಗ್ರಾಮ ಪಂಚಾಯತ್ ಸದಸ್ಯರಾಗಿಯೂ, ಕನ್ನಡ ಸಾಹಿತ್ಯ ಪರಿಷತ್ ಸದಸ್ಯರಾಗಿಯೂ, ಯಕ್ಷಧ್ರುವ ಪಟ್ಲ ಫೌಂಡೇಷನ್ ಬೆಳ್ತಂಗಡಿ ಘಟಕದ ಅಧ್ಯಕ್ಷರಾಗಿಯೂ, ಜೈನ್ ಮಿಲನ್ ಹಾಗೂ ಹಲವಾರು ಸಾಂಸ್ಕೃತಿಕ ಸಂಘಟನೆಗಳ ಪ್ರಮುಖರಾಗಿ ಸೇವೆ ಸಲ್ಲಿಸಿದ್ದಾರೆ.

ಅವರ ಸಾಧನೆಗಳನ್ನು ಗಮನಿಸಿ ಅವರಿಗೆ ಅನೇಕ ಸನ್ಮಾನಗಳು ದೊರಕಿವೆ. ಅಂತರಾಷ್ಟ್ರೀಯ ಕಾಮನ್‌ವೆಲ್ತ್ ಪ್ರಶಸ್ತಿ, ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಸಾಧನಾ ಪ್ರಶಸ್ತಿ, ಕರ್ನಾಟಕ ಜ್ಯೋತಿ ಪ್ರಶಸ್ತಿ, ಶ್ರೀದೇವಿ ಸಹಕಾರಿ ಪ್ರಶಸ್ತಿ ಮೊದಲಾದ ಅನೇಕ ಗೌರವಗಳು ಅವರಿಗೆ ಸಂದಿವೆ. ವಿಶೇಷವಾಗಿ, ಡಾ. ವೀರೇಂದ್ರ ಹೆಗ್ಗಡೆ ಅವರ 50ನೇ ಪಟ್ಟಾಭಿಷೇಕದ ಸಂದರ್ಭದಲ್ಲಿ, ಯದುವೀರ ಒಡೆಯರ್ ಮಹಾರಾಜರ ಸಮ್ಮುಖದಲ್ಲಿ ಭುಜಬಲಿಯವರಿಗೆ “ಸೇವಾ ತತ್ಪರ” ಎಂಬ ಅನ್ವರ್ಥ ಬಿರುದಿನಿಂದ ಸನ್ಮಾನಿಸಲಾಯಿತು.

ಒಟ್ಟಾರೆ, ಭುಜಬಲಿಯವರು ಧರ್ಮಸ್ಥಳದ ಸೇವೆಯನ್ನು ತಮ್ಮ ಜೀವನದ ಧ್ಯೇಯವನ್ನಾಗಿ ಮಾಡಿಕೊಂಡು, ಸೇವೆ, ಸಹಕಾರ ಮತ್ತು ಸಂಸ್ಕೃತಿ ಕ್ಷೇತ್ರಗಳಲ್ಲಿ ಅಳಿಯದ ಗುರುತು ಬಿಟ್ಟಿದ್ದಾರೆ.